بے نظیر انکم سپورٹ پروگرام کی رقم اب گھر بیٹھے حاصل کریں… See More
حکومتِ پاکستان نے بے نظیر انکم سپورٹ پروگرام (BISP) کے تحت ایک اہم ڈیجیٹل اقدام اٹھاتے ہوئے سوشل پروٹیکشن والٹ کا اجراء کر دیا ہے، جس کا مقصد کم آمدنی والے خاندانوں کو مالی امداد براہِ راست ان کے موبائل اکاؤنٹس میں منتقل کرنا ہے۔ یہ نیا نظام بدعنوانی، غیر ضروری کٹوتیوں اور ادائیگیوں میں تاخیر جیسے مسائل کو ختم کرنے کے لیے تیار کیا گیا ہے۔
تفصیلات کے مطابق سوشل پروٹیکشن والٹ ایک ڈیجیٹل والٹ ہے جو مستحقین کے موبائل نمبروں اور شناختی کارڈ کے ساتھ منسلک ہوگا۔ اس نظام کے ذریعے امدادی رقم براہِ راست متعلقہ خاندان کی خاتون کے اکاؤنٹ میں منتقل کی جائے گی۔ ماضی میں مستحق افراد کو رقم کے حصول کے لیے طویل لائنوں میں کھڑا ہونا پڑتا تھا اور بعض اوقات کٹوتیوں کا سامنا بھی کرنا پڑتا تھا، تاہم نیا نظام ان تمام مشکلات کا حل فراہم کرتا ہے۔
ہر مستحق خاندان کو حکومت کی جانب سے ایک خصوصی سرکاری سم (SIM) فراہم کی جائے گی۔ صارفین کو ہدایت کی گئی ہے کہ وہ قریبی BISP تحصیل دفتر جا کر اپنا شناختی کارڈ پیش کریں اور بائیومیٹرک تصدیق کرائیں۔ کامیاب تصدیق کے بعد انہیں مفت سرکاری سم جاری کی جائے گی، جسے فعال رکھنا ضروری ہوگا تاکہ امدادی رقم بروقت موصول ہو سکے۔
یہ بھی پڑھیں: بغیر ڈرائیونگ لائسنس گاڑی اور موٹرسائیکل چلانے والوں کے لئے بری خبر
سم فعال ہونے کے بعد مستحق افراد جاز کش، ایزی پیسہ یا متعلقہ بینک کے مرکز پر جا کر اپنا شناختی کارڈ اور بی آئی ایس پی سم دکھائیں، جہاں نمائندہ ان کا موبائل
والٹ بنا دے گا۔ یہ والٹ براہِ راست بی آئی ایس پی پروفائل کے ساتھ منسلک ہوگا، اور ہر قسط کی رقم خودکار طریقے سے اکاؤنٹ میں منتقل ہو جائے گی۔
اگر کوئی مستحق موبائل بینکنگ استعمال نہیں کرتا تو وہ کسی بھی مجاز BISP ریٹیلر کے پاس جا کر شناختی کارڈ اور سم کے ذریعے اپنی تصدیق کرا سکتا ہے۔ تصدیق مکمل ہونے پر PIN یا فنگر پرنٹ دینے کے بعد 13 ہزار 500 روپے نقد حاصل کیے جا سکیں گے اور اس عمل میں کسی قسم کی کٹوتی نہیں کی جائے گی۔
یہ نیا نظام ملک میں شفافیت کو فروغ دینے، خواتین کو مالی خودمختاری دینے اور ڈیجیٹل شمولیت بڑھانے کی سمت میں ایک اہم قدم قرار دیا جا رہا ہے۔ حکومت کے مطابق اب مالی امداد تک رسائی پہلے کے مقابلے میں زیادہ آسان، محفوظ اور تیز ہو گئی ہے۔